《玩嘢王》輪到整蠱馬明BB 呃咗3萬蚊呀!

1367904175_a539
馬明畀人叫佢借3萬蚊,不單冇O咀,仲爽快應承,馬明BB你真係易呃呀!

呢期李思捷套《玩嘢王》Hit到爆,雖然都係抄橋,不過觀眾一樣咁buy,上星期鍾嘉欣一集,2秒即喊崩潰演出呃晒所有觀眾,最勁係觀眾冇嬲不特止嘉欣,仲贏晒口碑、封佢做民意視后,連帶被整蠱嘅魔術師Louis,播出呢集之後即時收到廿個job,真係犀利。

而下集《玩嘢王》又整蠱邊個呢?原來到馬國明同陳敏之中招呀!今次李思捷搵咗曹永廉幫手,扮炒燶股票扮慘,向馬明BB借3萬蚊!馬明夠義氣一口應承!事後馬明知道被整蠱都冇嬲,問佢點解咁爽手,佢話同曹永廉咁老友、所以點都要借!

不過最勁都係陳敏之,佢被呃借成6位數!不過佢就賣關子話唔講得邊個問佢借住,仲話借嗰個真係好好朋友,所以冇所謂,畀人整蠱亦唔介意,同時亦有藝人唔肯借,不過就要到時睇《玩嘢王》先知係邊個啦!

來源:蘋果日報

Facebook Comment